विराटनगर । विराटनगरको महेन्द्र मोरङ आदर्श बहुमुखी क्याम्पसभित्रै हराएको शैक्षिक प्रमाणपत्रका लागि विद्यार्थीहरूले अनावश्यक रूपमा झन्झट भोग्नुपरेको खुलेको छ । पूर्वकै शैक्षिक धरोहर मानिएको क्याम्पसले लापरबाहीपूर्ण तरिकाले शैक्षिक प्रमाणपत्र हराएर त्यहाँ अध्ययनरत विद्यार्थीहरूलाई अनावश्यक हैरानी दिनेगरेको खुलेको हो ।
व्यवस्थापनतर्फ चार वर्षे स्नातकमा अध्ययनरत इलामकी उमा कार्की आफ्नो लब्धांक पत्र लिन गत मंगलबार कलेज पुगेकी थिइन् । तर, मार्कसिट हराएको र खोजेर भोलि उपलब्ध गराउने भन्दै कर्मचारीले पठाएका थिए । दोस्रो दिन बुधबार कलेज पुग्दा मार्कसिट नभेटिएको भन्दै उनलाई ३०० रुपैयाँको रसिद काटेर काठमाडौं जानका लागि सुझाइएको थियो ।
कर्मचारी स्वयमको लापरबाहीले गर्दा हराएको मार्कसिटका लागि आफूले अनावश्यक झन्झट पाएको महसुस गरेको उमाको दुःखेसो छ । आफूमात्र नभएर अन्य धेरै विद्यार्थी सोही प्रवृत्तिको समस्याबाट आजित भएको जनाउँदै उनले कुशल व्यवस्थापन नहुँदा कलेज प्रशासनले समय र पैसा खर्चन बाध्य बनाएको बताइन् । यसको जबाफदेहिता कलेज र कर्मचारीले लिनुपर्ने उाको भनाइ छ ।
यता, शैक्षिक प्रमाणपत्र शाखाले भने कर्मचारीहरूले व्यवस्थित रूपमा शैक्षिक कागजात नराखिदिँदा विद्यार्थीहरूले दुःख पाइरहेको स्वीकारेका छन् । क्याम्पसकी मुख्य कार्यालय सहायक नमिता निरौलाले अव्यवस्थित तरिकाले बोरामा खाँदेर राखिएका कारण शैक्षिक प्रमाणपत्र हराएको र यसबाट कर्मचारीलाई पनि खोज्न हैरान हुने गरेको जनाइन् ।
विद्यार्थीले मरिहत्ते गरेर पाएका शैक्षिक प्रमाणपत्र अव्यवस्थित रूपमा राखिएको भनेर कर्मचारी स्वयमले स्वीकार गर्दागर्दै क्याम्पस प्रमुख डा. रामावतार शरण व्यस्थित तरिकाले राखिएको दाबी गर्छन् । तथापि, विद्यार्थीको प्रमाणपत्र हराएको नभएर मिसप्लेस भएको हुन सक्ने भएकोले खोजेर यस समस्याको समाधान गर्ने उनको भनाइ छ ।
क्याम्पस प्रमुखले भनेझैं कर्मचारीको लापरबाहीले मिसप्लेस भएको भए, उक्त प्रमाणपत्र लिन विद्यार्थीले ३०० रुपैयाँको रसिद काट्नुपर्ने ? कर्मचारीको गल्तीको सजाय अनावश्यक रूपमा विद्यार्थीले कहिलेसम्म काँधमा बोकेर हिँड्नुपर्ने ? यस्ता कैयन प्रश्नहरूले शैक्षिक धरोहर महेन्द्र मोरङ क्याम्पस र त्यहाँ आबद्ध कर्मचारीहरू जकडिएका छन् ।
