सुर्खेत– १६ वर्षीया इनिसा विकको शव २७ दिनपछि अन्ततः परिवारले बुझ्ने भएका छन्। न्यायको माग गर्दै लामो समयसम्म शव नबुझेको परिवार अदालतको आदेशपछि शव बुझ्न तयार भएको हो।
परिवारका अनुसार बिहीबार दिउँसो भेरी पुल नजिकको सम्झिघाटमा उनको अन्त्येष्टि गरिने तयारी गरिएको छ। इनिसाको शव विगत २७ दिनदेखि प्रदेश अस्पतालको शवगृहमा राखिएको थियो।
मंगलबार जिल्ला अदालत सुर्खेतले बलात्कारपछि हत्या आरोपमा पक्राउ परेका चार जना नाबालकलाई पुर्पक्षका लागि बाल सुधारगृह पठाउने आदेश दिएको थियो। सोही आदेशपछि परिवारले शव बुझ्ने निर्णय गरेको हो।
गुर्भाकोट–६, बडाखोली घर भएकी इनिसा वीरेन्द्रनगर–१ मा बस्दै आएकी थिइन्। उषा बालबाटिका विद्यालयमा कक्षा ११ मा अध्ययनरत उनी फागुन २३ गते बिहान ट्युसन पढ्न जाने भन्दै घरबाट निस्किएकी थिइन्।
तर, सोही दिन बिहान वीरेन्द्रनगर–४ स्थित शहीद पार्क नजिकको जंगलमा उनी अचेत अवस्थामा फेला परेकी थिइन्। तत्काल प्रदेश अस्पताल कालागाउँ लगिए पनि चिकित्सकले उनलाई मृत घोषणा गरेका थिए।
घटनापछि प्रहरीले चार जना युवकलाई नियन्त्रणमा लिई अनुसन्धान अघि बढाएको थियो। प्रारम्भिक अनुसन्धानमा घटना शंकास्पद देखिएपछि बलात्कारपछि हत्या भएको आशंकामा अनुसन्धान अघि बढाइएको थियो।
इनिसाको घटनामा दोषीलाई कडा कारबाहीको माग गर्दै देशभर विभिन्न चरणमा प्रदर्शनसमेत भएका थिए।
