काठमाडौं – हवाई इन्धनको मूल्य दोब्बरले बढेसँगै आन्तरिक उडानको भाडा उल्लेख्य रूपमा बढेको छ। नेपाल नागरिक उड्डयन प्राधिकरणका अनुसार काठमाडौं–धनगढी रुटको अधिकतम भाडा अब २३ हजार ५९ रुपैयाँ पुगेको छ।
इन्धन मूल्य वृद्धिका कारण भाडामा ‘फ्युल सर्चार्ज’ मात्र बढाइएको जनाइएको छ। यसअघि धनगढी रुटमा इन्धन शुल्क ५ हजार ६ सय १० रुपैयाँ रहेकामा अब बढेर ११ हजार ९० रुपैयाँ पुगेको छ।
नेपाल आयल निगमले आन्तरिक हवाई इन्धनको मूल्य लिटरमा १ सय २५ रुपैयाँबाट बढाएर २ सय ५१ रुपैयाँ पुर्याएपछि यसको प्रत्यक्ष असर हवाई भाडामा परेको हो।
नयाँ दर अनुसार काठमाडौं–धनगढी रुटको न्यूनतम भाडा १४ हजार ४ सय ५७ रुपैयाँ कायम भएको छ। भाडामा इन्धनबाहेक वायुसेवा कम्पनीको शुल्क, १३ प्रतिशत भ्याट र विमानस्थल शुल्क समेत थप हुने गर्दछ।
अन्य रुटको नयाँ भाडादर यस्तो :
काठमाडौं–माउन्टेन: अधिकतम १८,०२६ / न्यूनतम ११,३४२
काठमाडौं–भद्रपुर: अधिकतम १५,८३७ / न्यूनतम ९,९८९
काठमाडौं–विराटनगर: अधिकतम १२,७६५ / न्यूनतम ८,०८८
काठमाडौं–जनकपुर: अधिकतम ७,०७० / न्यूनतम ५,५६५
काठमाडौं–पोखरा: अधिकतम ८,६०५ / न्यूनतम ५,०१५
काठमाडौं–भैरहवा: अधिकतम ११,०१६ / न्यूनतम ७,००६
काठमाडौं–नेपालगन्ज: अधिकतम १७,१४८ / न्यूनतम १०,८००
वायुसेवा सञ्चालकहरूका अनुसार बढ्दो डलर दर र इन्धन मूल्यका कारण उड्डयन क्षेत्र सञ्चालन गर्न कठिन बन्दै गएको छ।
