काठमाडौं । वैदेशिक रोजगारीका लागि विदेश जाने श्रमिकलाई दिइने अभिमुखीकरण तालिम शुल्क नबढेको वैदेशिक रोजगार विभाग ले स्पष्ट पारेको छ। विभागले जारी गरेको सूचनाअनुसार प्रति प्रशिक्षार्थी अभिमुखीकरण तालिम शुल्क ७ सय रुपैयाँ नै कायम रहेको छ। पछिल्लो समय केही तालिम प्रदायक संस्थाले २ हजार १ सय रुपैयाँसम्म लिने गरेको गुनासो आएपछि विभागले स्पष्टिकरण दिएको हो।
अभिमुखीकरण तालिम अनिवार्य रूपमा दुई दिन सञ्चालन हुने र सो अवधिभरको कुल शुल्क ७ सय रुपैयाँ नै हुने विभागले जनाएको छ। २०८१ असोज १३ गते जारी प्रेस विज्ञप्तिमार्फत यही शुल्क कायम रहेको पुनः पुष्टि गरिएको छ।
विभागले तोकिएको शुल्कभन्दा बढी रकम लिएको पाइएमा उजुरी गर्न आग्रह गर्दै त्यस्तो कार्य गर्ने संस्थाको इजाजत पत्र स्वतः खारेज गरिने चेतावनी दिएको छ।
वैदेशिक रोजगार ऐन २०६४ तथा सम्बन्धित नियमावलीअनुसार तालिम सञ्चालनका सबै मापदण्ड पालना गर्नुपर्ने विभागले स्मरण गराएको छ। साथै, सबै मान्यता प्राप्त तालिम प्रदायक संस्थालाई निर्धारित शुल्क मात्र लिन र कार्यविधि पूर्ण रूपमा पालना गर्न निर्देशन दिइएको छ।
