काठमाडौं – स्वास्थ्य तथा जनसंख्या मन्त्री निशा मेहताले सुगम क्षेत्रमा काज मिलाएर बसिरहेका विशेषज्ञ चिकित्सकहरूलाई आफ्नै दरबन्दी भएका अस्पतालमा फर्किन निर्देशन दिएकी छन्।
देशभर स्वास्थ्य सेवामा सन्तुलन कायम राख्न र दुर्गम क्षेत्रमा विशेषज्ञ चिकित्सकको अभाव अन्त्य गर्ने उद्देश्यसहित यस्तो निर्णय गरिएको मन्त्री मेहताले बताइन्।
उनका अनुसार पहिलो चरणमा नवौँ र दशौँ तहका १४ जना विशेषज्ञ चिकित्सकलाई उनीहरूको दरबन्दी रहेको अस्पतालमा फिर्ता पठाइसकिएको छ।
मन्त्री मेहताले दुर्गम क्षेत्रमा गुणस्तरीय स्वास्थ्य सेवा सुनिश्चित गर्न यो कदम आवश्यक रहेको उल्लेख गर्दै आगामी दिनमा पनि यस्तै कडाइ जारी रहने स्पष्ट पारिन्।
