काठमाडौं – रवि लामिछाने विरुद्धको सम्पत्ति शुद्धीकरण र सङ्गठित अपराधसम्बन्धी मुद्दाको अभियोग फिर्ता लिने निर्णयविरुद्ध दायर रिटमा आज पनि सर्वोच्च अदालतमा सुनुवाइ हुँदैछ। न्यायाधीशद्वय विनोद शर्मा र अब्दुल अजीज मुसलमानको संयुक्त इजलासमा बिहीबार सुनुवाइ नसकिएपछि आजका लागि हेर्दाहेर्दैमा राखिएको थियो।
उक्त इजलासमा चैत १० गतेदेखि निरन्तर सुनुवाइ भइरहेको भए पनि बहस नसकिँदा मुद्दा पटक–पटक हेर्दाहेर्दैमा पर्दै आएको छ। यसअघि न्यायाधीशद्वय सारङ्गा सुवेदी र सुनिलकुमार पोखरेलको इजलासले चैत ५ गते महान्यायाधिवक्ताको संशोधित निर्णय पेस गर्न आदेश दिएको थियो।
त्यसैगरी न्यायाधीशद्वय सपना प्रधान मल्ल र श्रीकान्त पौडेलको इजलासले फागुन २७ गते उक्त रिटलाई नियमित सुनुवाइका लागि पेस गर्न आदेश दिएको थियो।
तत्कालीन महान्यायाधिवक्ता सविता भण्डारी बरालले लामिछानेविरुद्ध लगाइएका मुद्दा फिर्ता गर्ने निर्णय गरेकी थिइन्, जसलाई बदर गर्न माग गर्दै युवराज पौडेल, दिनेश त्रिपाठी र आभास रेग्मीले छुट्टाछुट्टै रिट दायर गरेका थिए।
