काठमाडौं – नेपाली कांग्रेसले हाल तत्काल कुनै आन्दोलनका कार्यक्रम तय नगरेको स्पष्ट पारेको छ।
शनिबार सानेपा स्थित पार्टी केन्द्रीय कार्यालयमा आयोजित संसदीय सचेतना कार्यक्रमपछि सञ्चारकर्मीसँग कुरा गर्दै कांग्रेस प्रवक्ता देवराज चालिसे ले यस्तो जानकारी दिएका हुन्।
उनले सरकारको पछिल्लो व्यवहारप्रति असन्तुष्टि जनाउँदै भने, “सरकारको व्यवहार आग्रहपूर्ण देखियो। हामीले सडक आन्दोलन लगायतका कुनै कार्यक्रम गर्ने निर्णय गरेका छैनौं।”
चालिसेले आफ्नो पार्टीले सरकारबाट निष्पक्षता र न्यायपूर्ण व्यवहारको सुनिश्चितता खोजिरहेको बताए। “हामीले सरकारको निष्पक्षता र व्यवहारको सुनिश्चितता खोजेका हौं। आवश्यक परे थप निर्णय गर्छौं,” उनले भने।
यसका साथै, उनले जेन–जी आन्दोलनसम्बन्धी आयोगको प्रतिवेदनप्रति पनि आपत्ति जनाए। भदौ २३ गतेको जस्तै २४ गतेको घटनामा पर्याप्त अनुसन्धान नभएको उल्लेख गर्दै उनले उक्त घटनाको पनि निष्पक्ष छानबिन हुनुपर्ने माग गरे।
“२४ गतेको घटनालाई यत्तिकै छाड्न मिल्दैन। कसले विध्वंस गरायो, को दोषी हो भन्ने विषयमा जनतालाई स्पष्ट जानकारी दिनुपर्छ,” उनले जोड दिए।
