विराटनगर । पश्चिम एसियामा जारी द्वन्द्वको बीचमा विश्वव्यापी आपूर्ति जोखिम बढ्दै जाँदा भारतको रणनीतिक कच्चा तेल भण्डारले हालको अवस्थामा करिब पाँच दिनको मात्रै माग धान्न सक्ने देखिएको छ ।
अन्तर्राष्ट्रिय सञ्चार माध्यमका अनुसार कुल भण्डारण क्षमताको एक-तिहाइभन्दा बढी हिस्सा अझै खाली रहेकाले यस्तो अवस्था देखिएको हो ।
सन् २०२५ मा सार्वजनिक गरिएको भारतको नियन्त्रक तथा महालेखा परीक्षकको अडिट प्रतिवेदनले यी भण्डारण संरचनाहरू वर्षौँदेखि पूर्ण रूपमा प्रयोग नभएको उल्लेख गरेको छ ।
हालै इन्धन अभावको आशंकाले भारतका विभिन्न सहरहरूमा सर्वसाधारणबीच आत्तिएर किनमेल गर्ने प्रवृत्ति बढेको छ। तर केन्द्र सरकारले भने पेट्रोल र डिजेलको पर्याप्त मौज्दात रहेको जनाएको छ ।
मार्च २३, २०२६ मा राज्यसभामा प्रस्तुत गरिएको तथ्यांकले भारतसँग हाल लगभग ३.३७२ मिलियन मेट्रिक टन कच्चा तेल रहेको छ । आन्ध्र प्रदेश र कर्नाटकका तीन स्थानमा जम्मा ५.३३ मिलियन मेट्रिक टन कच्चा तेल भण्डारण गर्ने क्षमता छ।
भारतमा मासिक रूपमा करिब २० मिलियन मेट्रिक टन पेट्रोलियम पदार्थ खपत हुन्छ, जसअनुसार दैनिक औसत खपत करिब ०.६७ मिलियन मेट्रिक टन हुन्छ। यस आधारमा हालको रणनीतिक भण्डार करिब पाँच दिनका लागि मात्रै पर्याप्त हुने देखिन्छ ।
