काठमाडौं । इरानले संयुक्त राज्य अमेरिका को युद्धविराम प्रस्ताव अस्वीकार गर्दै डोनाल्ड ट्रम्प को सर्तमा युद्ध अन्त्य नहुने स्पष्ट पारेको छ।
इरानी अधिकारीहरूका अनुसार मध्यस्थकर्ता देशहरू मार्फत आएको अमेरिकी प्रस्ताव ‘धोखाधडी’ भएको र दबाब सिर्जना गर्न मात्रै ल्याइएको दाबी गरिएको छ। इरानले युद्ध अन्त्यका लागि पाँच प्रमुख सर्त अघि सारेको छ, जसमा आफ्नाविरुद्धका आक्रमण र लक्षित हत्या पूर्ण रूपमा रोक्नुपर्ने, भविष्यमा युद्ध नहुने सुनिश्चित ग्यारेन्टी, युद्ध क्षतिको क्षतिपूर्ति, सबै मोर्चामा शत्रुताको अन्त्य तथा हर्मुज जलमार्गमा आफ्नो अधिकारको अन्तर्राष्ट्रिय मान्यता हुनुपर्ने उल्लेख छ।
यसैबीच, अमेरिकाले इरानलाई १५ बुँदे योजना प्रस्ताव गरेको छ, जसमा इरानको आणविक कार्यक्रम नियन्त्रण, युरेनियम संवर्धन सीमितता, ब्यालिस्टिक तथा क्रूज मिसाइलमा नियन्त्रण र हर्मुज जलमार्ग पूर्ण रूपमा खुला राख्ने सर्त समावेश छन्। बदलामा इरानमाथिका आर्थिक प्रतिबन्ध हटाउने प्रस्ताव गरिएको छ।
अमेरिकी राष्ट्रपति ट्रम्पले इरानी नेतृत्व सम्झौता गर्न इच्छुक भए पनि आन्तरिक र बाह्य दबाबका कारण खुल्न नसकेको दाबी गरेका छन्।
तर, इरानका विदेशमन्त्री अब्बास अराघचीले तेहरान र वासिङ्टनबीच हाल कुनै औपचारिक वार्ता नरहेको स्पष्ट पारेका छन्। उनले विभिन्न माध्यमबाट आदानप्रदान भएका सन्देशलाई वार्ताको रूपमा लिन नसकिने बताएका छन्।
उता ह्वाइट हाउसकी प्रेस सेक्रेटरी क्यारोलिन लेभिटले अमेरिकाले इरानको सैन्य क्षमतामा निरन्तर कमजोरी ल्याइरहेको दाबी गर्दै हालसम्म हजारौं लक्ष्यमा प्रहार गरिएको र इरानी आक्रमणहरू उल्लेख्य रूपमा घटेको बताएकी छिन्।
