विराटनगर । विराटनगर महानगरपालिका–१५ का ३५ वर्षीय रोशन साहले पत्नीको हत्या गरी शव व्यवस्थापनका लागि सीटी सफारी प्रयोग गरेको घटना सार्वजनिक भएको छ ।
चैत ५ गते राति आफ्नी ३२ वर्षीया पत्नी कोमलकुमारी साहको घरभित्रै हत्या गरेका उनले शव लुकाउन उनले दाजु दीपेन्द्र साहको नाममा रहेको प्रदेश १–०२–००३ ह ५७०७ नम्बरको सीटी सफारी प्रयोग गरेका हुन् ।
हत्या गरेपछि रोशनले शवलाई हातखुट्टा बाँधी तन्नाले बेरेर करिब ४ किलोमिटर टाढा विराटनगर–१७ स्थित छाला फ्याक्ट्रीनजिकको कल्भर्टमुनि फालेको अनुसन्धानबाट खुलेको छ ।
घटनामा दाजु दीपेन्द्रले सवारी चलाएर सहयोग गरेको देखिए पनि हत्यामा उनको प्रत्यक्ष संलग्नता रहेको वा नरहेको विषयमा थप अनुसन्धान भइरहेको प्रहरीले जनाएको छ ।
चार दिनपछि मात्र घटना बाहिर आएको थियो। कल्भर्टमुनि पानीमा तन्नाले बेरिएको अवस्थामा शव फेला परेपछि स्थानीयले प्रहरीलाई खबर गरेका थिए । प्रारम्भमा शवको पहिचान गर्न कठिन भए पनि हराइरहेका व्यक्तिको विवरणसँग मिलाएर कोमलकुमारी भएको पुष्टि गरिएको थियो ।
रोशनले पत्नी हराएको नाटक गर्दै प्रहरीमा निवेदनसमेत दिएका थिए । तर अनुसन्धानका क्रममा उनी नै घटनामा संलग्न रहेको खुलेपछि प्रहरीले उनलाई पक्राउ गरेको हो । उनी भारततर्फ भाग्ने तयारीमा रहेका बेला घरबाटै नियन्त्रणमा लिइएको थियो ।
प्रहरीका अनुसार दाम्पत्य सम्बन्धमा उत्पन्न अविश्वास र विवाद नै घटनाको मुख्य कारण देखिएको छ । अहिले दुवै दाजुभाइलाई हिरासतमा राखी कर्तव्य ज्यान मुद्दामा थप अनुसन्धान भइरहेको छ ।
