काठमाडौं । पछिल्लो केही दिनयता सामाजिक सञ्जाल फेसबुकमा ‘वाइवाइ’ चाउचाउको नाम प्रयोग गरेर वार्षिकोत्सवको अवसरमा ५ हजार रुपैयाँ उपहार दिने भन्दै स्क्याम लिङ्क भाइरल भइरहेको छ।
उक्त लिङ्कमा क्लिक गर्दा प्रयोगकर्ताको फेसबुक, ह्वाट्सएपमा र बैंक खातासम्म ह्याक हुने उच्च जोखिम देखिएको छ। स्क्यामरहरूले प्रयोगकर्तालाई आकर्षित गर्न वाइवाइ को नाम र लोगो दुरुपयोग गरेका छन्।
भाइरल लिङ्क खोल्दा वाइवाइजस्तै देखिने नक्कली वेबसाइट खुल्ने गर्दछ, जहाँ नेपाली नाम र फोटोसहितका नक्कली कमेन्ट राखेर प्रयोगकर्तालाई विश्वास दिलाउने प्रयास गरिएको हुन्छ। त्यसपछि प्रयोगकर्तालाई केही प्रश्नको उत्तर दिन लगाइन्छ र अन्त्यमा ‘गिफ्ट बक्स’ छान्न लगाइन्छ।
साइबर सुरक्षा जानकारहरूले यस्ता लिंकबाट व्यक्तिगत जानकारी चोरी हुने, सामाजिक सञ्जाल तथा बैंकिङ प्रणाली ह्याक हुन सक्ने भएकाले अत्यन्त सावधानी अपनाउन आग्रह गरेका छन्।
