विराटनगर । विराट मेडिकल कलेज टिचिङ हस्पिटल को आयोजनामा विश्व क्षयरोग दिवसको अवसरमा प्रभातफेरी तथा सचेतना र्याली निकालिएको छ। बुढीगंगा गाउँपालिका–स्थित टंकीसिनवारी क्षेत्रमा मंगलबार कार्यक्रम सम्पन्न गरिएको हो।
हस्पिटलको सामुदायिक चिकित्सा विभागको आयोजना तथा स्वास्थ्य कार्यालय मोरङ सँगको सहकार्यमा ‘हो ! हामी क्षयरोग अन्त्य गर्छौँ: राष्ट्रिय अभियान, हाम्रो योगदान’ भन्ने नारासहित र्याली निकालिएको हो।
हरेक वर्ष मार्च २४ मा मनाइने विश्व क्षयरोग दिवस का अवसरमा आयोजित कार्यक्रममा विद्यार्थी, स्वास्थ्यकर्मी तथा विभिन्न संघसंस्थाका प्रतिनिधिहरूको उल्लेखनीय सहभागिता रहेको थियो। कार्यक्रममार्फत क्षयरोगको समयमै पहिचान, उपचार तथा रोकथामबारे समुदायमा सचेतना फैलाउने उद्देश्य राखिएको आयोजकले जनाएको छ।
विश्व स्वास्थ्य संगठनका अनुसार सन् २०२४ मा नेपालमा करिब ६७ हजार नयाँ क्षयरोगका बिरामी फेला परेका छन्। देशभरका ६ हजार २४१ स्वास्थ्य संस्थाबाट उपचार सेवा उपलब्ध रहेको छ भने ७८५ संस्थामा माइक्रोस्कोपी सेवा र १४२ संस्थामा द्रुत परीक्षण सेवा निःशुल्क रूपमा सञ्चालनमा छन्।
स्वास्थ्यकर्मीका अनुसार तीन हप्ता वा सोभन्दा बढी समयसम्म खोकी लाग्ने, खकारमा रगत देखिने, सास फेर्न गाह्रो हुने, तौल घट्ने, अत्यधिक पसिना आउने वा थकान महसुस हुने जस्ता लक्षण देखिएमा नजिकैको स्वास्थ्य संस्थामा परीक्षण गराउन आवश्यक हुन्छ।
कार्यक्रम डाक्टर सूर्य पराजुलीको संयोजकत्वमा सम्पन्न भएको थियो। र्यालीमा नाटा (NATA), बागमती सेवा समाज, बीएनएमटी नेपाल, युएनडीपी, उराँव मैत्री समाज लगायतका संस्थाहरू तथा एमबीबीएस अध्ययनरत १५० भन्दा बढी विद्यार्थीहरूको सहभागिता रहेको थियो।
