विराटनगर । गत भदौ २३ र २४ गते भएको जेनजी आन्दोलनको छानबिन गर्न बनेको आयोगले सरकारलाई बुझाएको प्रतिवेदन तत्काल सार्वजनिक गर्न मागसहित विराटनगरमा प्रदर्शन भएको छ ।
पूर्वन्यायाधीश गौरीबहादुर कार्की नेतृत्वमा बनेको आयोगले फागुन २४ गते नै सरकारलाई प्रतिवेदन बुझाएको थियो । प्रतिवेदनमा आयोगले तत्कालीन प्रधानमन्त्री केपी शर्मा ओली, गृहमन्त्री रमेश लेखकसहित उच्चपदस्थमाथि अनुसन्धान गरी कारबाही गर्न सिफारिस गरिएको छ ।
तर, सरकारले उक्त प्रतिवेदन सार्वजनिक गर्न ढिलाई भएपछि दबाब स्वरूप जेनजीहरू आन्दोलित छन् । यसैक्रममा विराटनगरमा परिवर्तनका लागि एकता नामक संस्थाका युवाहरूले धर्ना दिँदै तत्काल र जस्ताको त्यस्तै प्रतिवेदन सार्वजनिक गर्न दबाब दिएका हुन् ।
गत भदौ २३ गतेको जेन–जी आन्दोलनमा भएको सरकारी दमन र २४ भदौमा भएको उत्पातको घटनामा ७६ जनाको ज्यान गएको थियो ।
