काठमाडौं – कम्बोडियामा विभिन्न कारणले अलपत्र परेका २० नेपालीको उद्धार गरी स्वदेश फर्काइएको छ। विभिन्न प्रलोभनमा परेर कम्बोडिया पुगेका उनीहरुलाई बैंकक स्थित नेपाली दूतावासले उद्धार गरेको हो।
दूतावासका अनुसार उद्धार गरिएकाहरू अनलाइन स्क्यामिङ केन्द्र, ठगी गर्ने क्यासिनो तथा अन्य गैरकानुनी काममा संलग्न गराइएका र विनाभिसा बसिरहेका व्यक्तिहरू थिए।
दूतावासको पहल र कम्बोडिया सरकारको सहयोगमा उनीहरुलाई सुरक्षित रूपमा निकालिएको हो। गैरआवाशीय नेपाली संघ कम्बोडियाको सहजीकरणमा उनीहरुलाई बुधबार काठमाडौं पठाइएको थियो। उनीहरू शुक्रबार त्रिभुवन अन्तर्राष्ट्रिय विमानस्थल मा अवतरण गरेका छन्।
दूतावासले अझै केही नेपाली अलपत्र रहेको जानकारी प्राप्त भएको भन्दै उनीहरुको उद्धारका लागि पहल भइरहेको जनाएको छ।
