भारतको इन्दौरस्थित बंगाली स्क्वायर नजिकैको एक कोलोनीमा बुधबार बिहान विद्युतीय कार चार्ज गर्ने क्रममा भएको आगलागीमा एकै परिवारका ६ जनाको ज्यान गएको छ भने तीन जना गम्भीर घाइते भएका छन्।
प्रारम्भिक जानकारीअनुसार विद्युतीय कारको चार्जिङ पोइन्टमा सर्ट सर्किट हुँदा सुरु भएको आगो विस्तारै घरसम्म फैलिएको थियो।
घरभित्र भण्डारण गरिएका ग्यास सिलिन्डरमध्ये चारवटा विस्फोट भएपछि आगो झन् भयावह बनेको भारतीय सञ्चारमाध्यमहरूले जनाएका छन्।
इन्दौरका प्रहरी आयुक्त सन्तोष कुमार सिंहका अनुसार, घर बाहिर चार्ज भइरहेको विद्युतीय सवारीबाट सुरु भएको आगो घरभित्र फैलिएको हो। घरमा १० भन्दा बढी ग्यास सिलिन्डर राखिएकोमा केही विस्फोट हुँदा ठूलो क्षति भएको उनले बताए।
घटनाबारे थप अनुसन्धान भइरहेको प्रहरीले जनाएको छ।
