काठमाडौं — प्रत्येक वर्ष चैत्र कृष्ण औँसीका दिन मनाइने घोडेजात्रा आज मनाइँदैछ। पर्वका अवसरमा काठमाडौं उपत्यकामा सार्वजनिक बिदा दिइएको छ।
नेपाली सेना द्वारा टुँडिखेलमा अश्वकला, मोटरसाइकल खेल, शारीरिक व्यायाम तथा युद्धकलाको विशेष प्रदर्शन गरिँदैछ। कार्यक्रममा राष्ट्रपति, उपराष्ट्रपति र प्रधानमन्त्रीलगायत विशिष्ट व्यक्तित्वहरूको सहभागिता रहनेछ।
जनविश्वासअनुसार टुँडिखेल आसपास बस्ने ‘गुरुमापा’ नामक राक्षसको आतंकबाट बालबालिकालाई जोगाउन घोडेजात्रा मनाउने परम्परा बसेको हो। घोडाको टापले उसको आत्मालाई दबाइने विश्वास गरिन्छ।
यसै अवसरमा ललितपुरमा पनि आँखा नदेख्ने घोडा दौडाएर घोडेजात्रा मनाउने परम्परा रहिआएको छ।
