विराटनगर । प्रि–मनसुन सुरु भएसँगै अपराह्नपछि हावाहुरी, चट्याङ र असिनासहित वर्षाको गतिविधि बढ्न थालेको छ । जसका कारण कोशी प्रदेशमा २४ घण्टाभित्र तीनजनाको मृत्यु भएको छ भने चारजना घाइते भएका छन् ।
राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार आइतबार चट्याङ खस्दा भोजपुरको षडानन्द नगरपालिका– ९, भैँसेकी २५ वर्षीया शर्मिला तामाङको ज्यान गएको छ । यस्तै उदयपुरको कटारी नगरपालिका–८ थलीयाटारकी मिनामाया तामाङ र कटारी नगरपालिका–५ निवासी ६४ वर्षीय वीरेन्द्र चौधरीको हावाहुरीका कारण मृत्यु भएको हो ।
