विराटनगर । मोरङको निर्वाचन क्षेत्र नम्बर ६ का नेकपा (एमाले) का उम्मेदवार विनोद ढकालले निर्वाचन खर्चको विवरण सार्वजनिक गरेका छन् ।
फागुन २१ मा सम्पन्न प्रतिनिधिसभा सदस्य निर्वाचनमा गरेको खर्चको विवरण उनले फागुन २७ गते निर्वाचन आयोगसँगै प्रदेश निर्वाचन कार्यालय विराटनगरमा पेश गरेका हुन् ।
उनले चुनावी अभियानका क्रममा कुल ९ लाख ७० हजार ३५८ रुपैयाँ खर्च भएको विवरण निर्वाचन आयोगलाई बुझाएका हुन् ।
निर्वाचन अवधिभर ७ लाख ५५ हजार रुपैयाँ आम्दानी भएको र खर्च आम्दानीभन्दा बढी भएकाले २ लाख १५ हजार ३५८ रुपैयाँ अझै तिर्न बाँकी रहेको आयोगलाई बुझाएको विवरणमा उल्लेख छ ।
निर्वाचनमा उठेको रकम र गरिएको खर्चको विवरण उम्मेदवारले आयोगलाई बुझाएर सार्वजनिक गर्नुपर्ने व्यवस्था छ । उम्मेदवारी दर्ताका लागि १० हजार रुपैयाँ खर्च गरिएको छ भने मतदाता नामावली खरिदका लागि १८ हजार रुपैयाँ खर्च भएको छ ।
सवारी साधन भाडा र इन्धनमा १ लाख २९ हजार ७ सय, प्रचार सामग्री छपाइमा २ लाख १५ हजार तथा झन्डा, ब्यानर, स्टिकर तथा ध्वनि प्रणाली साउन्ड सर्भिस प्रयोगका लागि १ लाख २४ हजार रुपैयाँ खर्च भएको छ ।
त्यस्तै सम्पर्क कार्यालय व्यवस्थापनमा १ लाख २३ हजार भएको छ भने घरदैलो कार्यक्रम र मतदाता प्रशिक्षण कार्यक्रममा १ लाख १३ हजार खर्च भएको छ । बुथ एजेन्टको व्यवस्थापनका लागि १ लाख ४३ हजार ७१५ रुपैयाँ खर्च गरिएको आयोगको विवरणमा उल्लेख छ ।
