विराटनगर । मोरङको बूढीगंगा गाउँपालिका-४ हात्तीमूढास्थित मनमोहन स्मृति प्राविधिक विश्वविद्यालयमा चिनियाँ राष्ट्रपति सि जिनपिङको जीवनीसम्बन्धी किताब जलाइएको छ ।
कलेजले इन्जिनियरिङ ल्याब बनाउनका लागि कोठा खाली गराउँदा चिनियाँ कम्युनिष्ट पार्टीका नेता तथा राष्ट्रपति सि जिनपिङको जीवनीसम्बन्धी पुस्तक पनि जलाएको हो ।
रजिस्ट्रारको कार्यालयले ल्याबका लागि चाहिएको ठाउँमा राखिएका थोत्रा कागजात नष्ट गर्न दिएको निर्देशन पालना गर्दै कलेजको स्टोर शाखाले शनिबार साँझतिर दुई कार्टुनजति सि जिनपिङका किताब पनि जलाएको थियो ।
कलेज प्रशासनले पुस्तक तथा महत्त्वपूर्ण कागजातमा आगो लगाएको भन्दै विद्यार्थी र सञ्चारकर्मी पुगेपछि केही समय कलेज परिसरमा विवादको अवस्था सिर्जना भएको थियो । जसक्रममा इन्जिनियरतर्फकी डिन डा. रेखा श्रेष्ठले सूचना संकलनका लागि पुगेका पत्रकारलाई बिदाको दिन पनि किन रिपोर्टिङ गर्नुपर्यो भन्दै क्यामेरा खोस्न खोजेर दुर्व्यवहार गरेकी थिइन् ।
पुस्तक जलाइएको दृश्य देखेपछि आशंकित विद्यार्थीहरूले घटनाबारे स्पष्टीकरण लिन खोज्दा उल्टै सूचना दिने विद्यार्थीलाई नै कारबाहीको चेतावनी दिएकी थिइन् ।
जिनपिङको किताब कहाँबाट र कसरी आए अनि त्यसलाई अकस्मात जलाउनुपर्ने अवस्था किन आयो भन्ने विषयमा कलेज प्रशासनसँग जानकारी लिएका थियौं ।
जसमा प्रशासनले तत्कालीन मनमोहन स्मृति प्रतिष्ठानको कार्यालयलाई दाताबाट प्राप्त भएको दुई कार्टुन किताब थोत्रा कागजसँगै राखेर नष्ट गरिएको बताएको छ ।
धमिराले खाएका कापी-किताबसँगै केही किताब जलाएर नष्ट पारिएको प्रशासनले जनाएको छ ।
