काठमाडौं — डोनाल्ड ट्रम्पले इरान सँगको सम्भावित सम्झौताबारे टिप्पणी गर्दै इरान सम्झौता गर्न चाहिरहेको भए पनि आफूलाई अहिले त्यस्तो सम्झौता स्वीकार्य नभएको बताएका छन्।
ट्रम्पले आफ्नो सामाजिक सञ्जाल प्लेटफर्म ट्रूथ सोसियलमा लेख्दै अमेरिकी सेनाले इरानविरुद्ध गरेको कारबाहीलाई ‘फेक न्युज मिडिया’ले सही तरिकाले नदेखाएको आरोप लगाए।
उनले पोस्टमा लेखेका छन्, “फेक न्युज मिडियाले अमेरिकी सेनाले इरानविरुद्ध कति उत्कृष्ट प्रदर्शन गरेको छ भन्ने कुरा देखाउन चाहँदैन।”
ट्रम्पका अनुसार इरान अहिले पूर्ण रूपमा पराजित भइसकेको छ र अमेरिकासँग सम्झौता गर्न चाहिरहेको छ। तर हालको अवस्थामा आफूलाई त्यस्तो सम्झौता स्वीकार्य नभएको उनले स्पष्ट पारे।
उनको यो टिप्पणी अमेरिका र इरानबीच जारी तनावका बीच आएको हो। यसअघि पनि उनले अमेरिकी हमलामा इरानका धेरै सैन्य संरचनामा ठूलो क्षति पुगेको दाबी गरेका थिए।
हाल संयुक्त राज्य अमेरिका र इरान बीचको पछिल्लो घटनाक्रमबारे अन्तर्राष्ट्रिय सञ्चारमाध्यमहरूमा फरक–फरक दाबी सार्वजनिक भइरहेका छन्।
