मलङ्गवा (सर्लाही) — सर्लाहीको बरहथवा मा स्कारपियोको ठक्करबाट एक जनाको मृत्यु भएको छ भने ११ जना घाइते भएका छन्।
शुक्रबार साँझ बरहथवा नगरपालिका–१० सीतापुरस्थित सडकमा बरहथवाबाट सीतापुरतर्फ जाँदै गरेको डि एल ९ सि जेड ०७७७ नम्बरको स्कारपियोले बिहेमा जन्ती आएका व्यक्तिहरूलाई ठक्कर दिएको प्रहरीले जनाएको छ।
सरोज राई (प्रहरी नायब उपरीक्षक तथा सर्लाहीका प्रहरी प्रवक्ता) का अनुसार दुर्घटनामा घाइते भएका बरहथवा नगरपालिका–९ निवासी करिब ५० वर्षीय नारायण जर्गा मगर लाई उपचारका लागि नगर अस्पताल बरहथवा लगिएकोमा चिकित्सकले मृत घोषणा गरेका हुन्।
दुर्घटनामा रौतहट दोस्तिया पिपरिया निवासी ७० वर्षीय कमल पटेल, रौतहट गढीमाई नगरपालिका–११ निवासी बन्धना पटेल, बरहथवा–१० निवासी रुपेश मण्डल, प्रतिमाकुमारी पटेल, दिलीप राय, बरहथवा–७ निवासी चन्दन पासवान, बरहथवा–१० निवासी दीपिका जैसवाल, रामजी राय, मुकेश राउत, रामनारायण ठाकुर र गुलाबकुमारी मण्डल घाइते भएका छन्।
घाइतेमध्ये केहीको अवस्था गम्भीर रहेको प्रहरीले जनाएको छ। उनीहरूको बरहथवास्थित विभिन्न अस्पतालमा उपचार भइरहेको छ।
दुर्घटनापछि स्कारपियो चालक बरहथवा नगरपालिका–१२ लौकठ निवासी करिब ४० वर्षीय नरेश ठाकुर लाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
