मोरङ । मोरङ र सुनसरी जिल्लाका विभिन्न स्थानबाट प्रहरीले प्रतिबन्धित लागूऔषध र गाँजासहित ३ जनालाई पक्राउ गरेको छ।
फागुन २९ गते सुनसरीको गढी गाउँपालिका–२ औरावनी चोकस्थित शिवमहिमा मेडिकल हल सञ्चालन गर्दै आएकी मोरङको सुन्दरहरैचा नगरपालिका–८ घर भई हाल सोही स्थानमा डेरा गरी बस्दै आएकी ३२ वर्षीया मोनिका चौधरीलाई प्रहरीले नियन्त्रणमा लिएको हो। उनले सञ्चालन गर्दै आएको फार्मेसीबाट प्रतिबन्धित लागूऔषध बिक्री भइरहेको विशेष सूचनाका आधारमा कोशी प्रदेश प्रहरी कार्यालय विराटनगरको प्रादेशिक अनुसन्धान समूह र इलाका प्रहरी कार्यालय दुहबीबाट खटिएको टोलीले खानतलासी गर्दा ट्रामाडोल र स्पास्पेन गरी जम्मा २ हजार ९ सय ३० ट्याब्लेट फेला परेको प्रहरीले जनाएको छ।
त्यसैगरी मोरङको विराटनगर–३ बरगाछी चोकबाट भारतको अररिया निवासी पृथ्वी कुमार सिंह र कृष्ण कुमार सिंहलाई ११ किलो ५२ ग्राम गाँजासहित जिल्ला प्रहरी कार्यालय मोरङले पक्राउ गरेको छ।
पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।
