अमेरिका र इजरायलले गरेको आक्रमणमा परी इरानका नयाँ सर्वोच्च नेता मोज्तबा खामेनी पनि घाइते भएको खुलेको छ।
अमेरिकी टेलिभिजन नेटवर्क सिएनएनले स्रोतलाई उद्धृत गर्दै प्रकाशित गरेको समाचारमा नयाँ सर्वोच्च नेता मोज्तबा अमेरिका–इजरायलले गरेको पहिलो दिनकै हवाई हमलामा घाइते भएको उल्लेख गरिएको छ।
खामेनीको खुट्टा भाँचिएको छ भने अनुहारमा पनि सामान्य चोट लागेको बताइएको छ।
डिसेम्बर अठ्ठाइस मा तेहरानमा भएको आक्रमणमा त्यतिबेला सर्वोच्च नेता रहेका आयातोल्लाह अली खामेनेई सहित शीर्ष अधिकारीहरू मारिएका थिए। उक्त हमलामा खामेनी परिवारका पाँच सदस्य पनि मारिएका थिए।
साइप्रसका लागि इरानी राजदूत अलिरेजा सलारियनले बेलायती पत्रिका द गार्डियनलाई दिएको जानकारी अनुसार मोज्तबा आफ्ना पिता अली खामेनेई मारिएकै हवाई आक्रमणमा घाइते भएका थिए।
छपन्न वर्षीय मोज्तबाको देब्रे आँखाको वरिपरि चोट लागेको र अनुहारमा सानो काटिएको समेत देखिएको स्रोतलाई उद्धृत गर्दै सिएनएनले जनाएको छ। यसअघि इसराइली अखबार टाइम्स अफ इसराइलले पनि अली खामेनेईमाथि भएको आक्रमणमा मोज्तबा घाइते भएको उल्लेख गरेको थियो।
नयाँ सर्वोच्च नेताका रूपमा नियुक्त भएको घोषणा भए पनि खामेनी अहिलेसम्म सार्वजनिक रूपमा देखिएका छैनन् र उनले कुनै सम्बोधन पनि गरेका छैनन्।
राजदूत सलारियनका अनुसार चोटपटकका कारण मोज्तबा अहिले भाषण दिन सक्ने अवस्थामा छैनन्।
इरानी राष्ट्रपति मशुद पेजिस्कियनका छोरा युसेफ पेजिस्कियनले राज्य समाचार संस्था इरानियन स्टुडेन्ट्स न्युज एजेन्सीसँग कुरा गर्दै खामेनी घाइते भए पनि अवस्था चिन्ताजनक नरहेको बताएका छन्।
मोज्तबा खामेनी सार्वजनिक रूपमा नदेखिएपछि इरानी सरकारी सञ्चारमाध्यमहरूले पुराना भिडियो र सीमित दृश्यहरू प्रयोग गर्दै आएका छन्।
धार्मिक व्यक्तित्वका रूपमा चिनिने मोज्तबा आफ्ना पिता अली खामेनेईले दशकौंसम्म बनाएको राजनीतिक तथा सुरक्षा सञ्जालमा प्रभावशाली व्यक्तिका रूपमा मानिन्छन्। उनी विशेषगरी इस्लामिक रिभोलुसनरी गार्ड कोरसँग नजिक मानिन्छन् र विश्लेषकहरूले उनलाई आफ्ना पिताभन्दा पनि कडा धारका नेताका रूपमा हेर्ने गरेका छन्।
सन् दुई हजार उन्नाइस मा अमेरिकाले मोज्तबा खामेनीमाथि पनि प्रतिबन्ध लगाएको थियो। अमेरिकी अधिकारीहरूले उनलाई क्षेत्रीय प्रभाव विस्तार गर्न र आन्तरिक दमनलाई सघाएको आरोप लगाएका थिए।
यसैबीच अमेरिकी राष्ट्रपति डोनाल्ड ट्रम्पले इरानको नयाँ सर्वोच्च नेताका रूपमा खामेनीको चयनप्रति असन्तुष्टि जनाउँदै यसलाई स्वीकार्य नहुने बताएका छन्।
