काठमाडौं। धनगढी उपमहानगरपालिका–१३ मा मंगलबार साँझ दुई समूहबीच झडप भएको छ।
झडप उग्र बन्दै गएपछि स्थिति नियन्त्रणमा लिन प्रहरीले ६ राउन्ड हवाइ फायर गरेको जनाएको छ। जिल्ला प्रहरी कार्यालय कैलाली का प्रमुख एसपी नरेन्द्र चन्दका अनुसार अवस्था नियन्त्रणबाहिर जान थालेपछि हवाइ फायरिङ गर्नुपरेको हो।
घटनाका क्रममा असई डबल साउद र इन्सपेक्टर बलराम पाण्डे घाइते भएका छन्। उनीहरूको उपचार सेती प्रादेशिक अस्पताल मा भइरहेको प्रहरीले जनाएको छ।
प्रारम्भिक अनुसन्धानअनुसार होली खेलेर बसेका व्यक्तिहरूबीच मदिरा सेवनकै क्रममा विवाद चर्किँदा झडप भएको हो।
प्रहरीले घटनामा संलग्न १२ जनालाई नियन्त्रणमा लिई थप अनुसन्धान गरिरहेको जनाएको छ।
