रंगेली । मोरङको रंगेली बजारमा रास्वपाका उम्मेदवारद्वय रवि लामिछाने र बालेन्द्र साहको तस्बिर भएका टिसर्ट खुलेआम बिक्री हुने गरेको पाइएको छ । निर्वाचन आयोगको आचारसंहिताविपरीत रंगेलीका कपडा पसलेले बालेन- रवि अंकित होलीलक्षित टिर्सट खुलेआम बिक्री गर्दा प्रशासन मुकदर्शक बनेको छ ।
निर्वाचन आयोगको आचारसंहिता २०८२ ले चुनाव अवधिभरि कुनै पनि राजनीतिक दल वा उम्मेदवारको नाम र तस्बिर अंकित टिसर्ट बिक्री वितरणमा प्रतिबन्ध लगाएको छ । आयोगले पार्टी र उम्मेदवार अंकित टिसर्टमात्र नभएर ज्याकेट, कमिज, भेस्ट, टिसर्ट, टोपी-क्याप, गम्छा, मास्क, लकेट वा अन्य किसिमको पहिरन वा स्टिकर, लोगो, झोला, ब्याच, ट्याटुजस्ता सांकेतिक सामग्री उत्पादन गर्न, प्रयोग गर्न वा प्रदर्शन गर्न गराउन नहुने जनाएको छ ।
तर, रंगेलीका कपडा पसलेले भने आयोगको नियमलाई अटेर गर्दै खुलेआम पसलमा डिस्पे गरेर टिसर्ट बेच्ने गरेका छन् । यस्तै रंगेलीमा साइकल वा सफारीमा यस्ता टिसर्ट प्रदर्शन गर्दै बिक्री गर्नेक्रम बढ्दो देखिएको छ । अझ, आयोग वा स्थानीय प्रशासनले अनुगमन नगर्दा व्यापारीहरूको मनोबल बढेको भन्दै स्थानीय असन्तुष्ट बनेका छन् ।
‘यसरी खुलेआम पार्टी र उम्मेदवारको तस्बिर अंकित बिक्री गर्दा आममतदाताको मनोभाव फेरबदल हुन सक्छ,’ एक स्थानीय भन्छन्,’ सकेसम्म व्यापारीले यस्ता सामग्री बेच्नु हुँदैन र प्रशासनले बेलैमा यसको अनुमगन गरी सबै पसलेबाट यस्ता सामग्री जफत गनर्’पर्छ ।’
यता, प्रहरी प्रशासनले भने शनिबारमात्रै रंगेली बजारबाट ४९ थान टिसर्ट बरामद गरेको जनाएको छ । स्थानीयको सूचनापछि रंगेलीका विभिन्न कपडा पसलबाट दल वा उम्मेदवार अंकित टिर्सट बेचिरहेको स्थानबाट त्यस्ता कपडा बरामद गरिएको इलाका प्रहरी कार्यालय, रंगेलीका इन्सपेक्टर नगेन्द्र बोगटीले शब्द एक्सप्रेसलाई जानकारी दिए ।
उनका अनुसार प्रहरी नायब उपरीक्षक पुरुपोत्तम पाण्डेको नेतृत्वको प्रहरी टोलीले उक्त कपडा बरामद गरेको हो । निर्वाचन अवधिभरि यस्ता टिसर्ट बेच्न नपाइने बताउँदै यस्तो कार्य दोहोरिएमा कपडा पसलेलाई कारबाही हुने उनको चेतावनी छ ।
