विराटनगर । विराटनगरस्थित मोर्डन एरा स्कुलका विद्यार्थीहरूले ‘बाटो बिराएको बादल’ नामक नाटक सफलतापूर्वक मञ्चन गरेका छन्। विद्यालयको कक्षा ९ मा अध्ययनरत छात्र दिवस न्यौपानेको निर्देशनमा तयार भएको उक्त नाटक बुधबार आरोहण गुरुकुलमा प्रदर्शन गरिएको हो।
बुधबार दिउँसो १२ बजे पहिलो शो प्रस्तुत गरिएको थियो भने दुई वटा शो सञ्चालन गरिएको विद्यालयका प्रिन्सिपल इन्द्रकुमार राईले जानकारी दिए। रचना सापकोटाले लेखन गरेको नाटकको व्यवस्थापन साइमन कार्कीले गरेका हुन्। नाटकमा कक्षा ९ का १४ जना विद्यार्थीहरूले अभिनय गरेका थिए।
नाटक अवलोकन गर्न पुगेका प्याब्सन विराटनगरका अध्यक्ष अर्जुन श्रेष्ठले विद्यार्थीहरूको अभिनय मर्मस्पर्शी र मनछुने रहेको प्रतिक्रिया दिए।
नाटकले अभिभावकको बेवास्ताका कारण विद्यालय उमेरकी छोरीले भोग्नुपर्ने समस्या तथा सम्भावित दुर्घटनालाई कथामार्फत प्रस्तुत गरेको छ। अभिभावकीय जिम्मेवारीको अभाव र प्रशासनिक उदासीनताले निर्दोष छात्राको भविष्य कसरी अन्धकारतर्फ धकेलिन सक्छ भन्ने गम्भीर सन्देश नाटकको मुख्य विषयवस्तु रहेको छ।
यसैगरी प्याब्सन मोरङका वरिष्ठ उपाध्यक्ष मोहन बुढाथोकीले विद्यार्थीहरूले समसामयिक तथा संवेदनशील विषयवस्तु उठान गरेकोमा प्रशंसा गरे।
विद्यालयका प्रिन्सिपल इन्द्र राईले विद्यालयले गुणस्तरीय शिक्षासँगै विद्यार्थीहरूलाई अतिरिक्त क्रियाकलापमा पनि सक्रिय रूपमा सहभागी गराउँदै आएको बताए।
