सुनसरी । सुनसरी निर्वाचन क्षेत्र नं. ४ का नेपाली कांग्रेसका उम्मेदवार ज्ञानेन्द्रबहादुर कार्कीले आगामी फागुन २१ गते हुने निर्वाचनपछि नेपाली कांग्रेसको नेतृत्वमा सरकार बन्ने दाबी गरेका छन् ।
देशभर देखिएको राजनीतिक माहोल कांग्रेसको पक्षमा उन्मुख रहेको उल्लेख गर्दै उनले यसपटक जनताले स्थिरता र विकासको पक्षमा मतदान गर्ने विश्वास व्यक्त गरे । हरिनगर गाउँपालिका–१ वडा कार्यसमितिले आयोजना गरेको चुनावी कार्यक्रममा सम्बोधन गर्दै कार्कीले आफूलाई अनुभवी तथा सबैलाई मिलाएर लैजान सक्ने नेताको रूपमा प्रस्तुत गरेका छन् ।
उनले विभिन्न राजनीतिक धार र समुदायबीच समन्वय कायम गर्दै अघि बढ्नु नै वर्तमान समयको आवश्यकता भएको बताए । “देशमा पटक–पटक सरकार परिवर्तन हुँदा विकास निर्माणका काम प्रभावित भएका छन्,” उनले भने, “अब स्थिर, समावेशी र जिम्मेवार सरकार आवश्यक छ, जसले सबै पक्षलाई साथमा लिएर अघि बढ्न सक्छ। त्यो क्षमता कांग्रेससँग छ ।”
कार्कीले सुनसरी निर्वाचन क्षेत्र नं. ४ मा विगत केही वर्षमा भएका विकास निर्माणका कार्यहरूको चर्चा गर्दै सडक, शिक्षा, स्वास्थ्य, खानेपानी तथा सिंचाइ क्षेत्रमा भएको प्रगतिलाई उदाहरणका रूपमा प्रस्तुत गरेका छन् ।
२०७४ अघिको अवस्था र अहिलेको अवस्थाबीच स्पष्ट अन्तर देखिएको उनको दाबी थियो । “मैले यो क्षेत्रको विकासका लागि निरन्तर प्रयास गरेको छु, आगामी दिनमा अझ तीव्र गतिमा काम गर्ने प्रतिबद्धता व्यक्त गर्दछु,” उनले भने ।
उनले हालै बंगलादेशमा सम्पन्न निर्वाचनको उदाहरण दिँदै जनमतले कहिलेकाहीँ राजनीतिक विश्लेषणभन्दा फरक परिणाम दिन सक्ने उल्लेख गरे। “जनताको अन्तिम निर्णय नै निर्णायक हुन्छ,” उनले भने, “नेपालमा पनि जनताको समर्थन कांग्रेसतर्फ केन्द्रित हुँदै गएको छ भन्नेमा म विश्वस्त छु ।”
कार्कीले राजनीतिक स्थायित्व, आर्थिक सुधार, रोजगारी सिर्जना, कृषिको आधुनिकीकरण र सुशासनलाई आफ्नो प्राथमिकता रहेको बताए । उनले युवालाई स्वदेशमै अवसर सिर्जना गर्ने, किसानलाई प्राविधिक सहयोग र बजार सुनिश्चित गर्ने तथा स्थानीय तहसँग समन्वय गरी समग्र क्षेत्रको सन्तुलित विकास गर्ने प्रतिवद्धता व्यक्त गरे ।
कार्यक्रममा सहभागी स्थानीय नेता तथा कार्यकर्ताहरूले आगामी निर्वाचनमा एकजुट भएर कांग्रेसका उम्मेदवारलाई विजयी गराउने प्रतिबद्धता जनाएका थिए । कार्यक्रममा विभिन्न वडाबाट आएका सर्वसाधारणको उल्लेखनीय उपस्थिति रहेको थियो । कार्यक्रमको अन्त्यमा कार्कीले लोकतन्त्रको सुदृढीकरण र स्थिर सरकार गठनका लागि विवेकपूर्ण मतदान गर्न मतदातासँग आग्रह गरे ।
