खोटाङ – खोटाङमा १३ वर्षीया छात्रामाथि जबरजस्ती करणी गरेको आरोपमा एक शिक्षक पक्राउ परेका छन्। पक्राउ पर्नेमा दिक्तेलस्थित एक बोर्डिङ स्कुलमा कार्यरत सोलुखुम्बु थुलुङ दुधकोसी गाउँपालिका–१, नेलेका २४ वर्षीय टेकबहादुर खत्री रहेका छन्।
जिल्ला प्रहरी कार्यालय खोटाङका अनुसार फागुन ९ गते होमवर्क सिकाइ दिने बहानामा छात्रालाई आफ्नै कोठामा बोलाई जबरजस्ती करणी गरेको भन्दै परिवारले जाहेरी दिएका छन्। घटनापछि बालिकालाई करिब तीन घण्टासम्म कोठामा थुनेर राखिएको आरोप समेत लगाइएको छ।
पीडित बालिका रुँदै घर पुगेपछि मात्रै अभिभावकले घटनाबारे जानकारी पाएका थिए। परिवारबाट जानकारी प्राप्त हुनासाथ आरोपित शिक्षकलाई पक्राउ गरिएको जिल्ला प्रहरी कार्यालय खोटाङका प्रमुख डिएसपी प्रकाश बुढाथोकीले जानकारी दिएका छन्।
परिवारले लिखित जाहेरी दर्ता गराइसकेको र घटनाबारे थप अनुसन्धान भइरहेको प्रहरीले जनाएको छ। पीडित बालिकाको जिल्ला अस्पताल खोटाङमा स्वास्थ्य परीक्षण गरिएको छ।
