प्रविधि कम्पनी गूगलले आफ्नो नयाँ कृत्रिम बुद्धिमत्ता (एआई) मोडेल ‘जीमीनी ३.१ प्रो’ सार्वजनिक गरेको छ। जटिल समस्या समाधानमा अझ सशक्त क्षमता प्रदान गर्ने लक्ष्यसहित यो मोडेल ल्याइएको कम्पनीले जनाएको छ।
गत नोभेम्बर १९ मा ‘जीमीनी ३ प्रो’ सार्वजनिक गरेको तीन महिनापछि गुगलले यसको उन्नत संस्करण ‘जीमीनी ३.१ प्रो’ बजारमा ल्याएको हो। कम्पनीका अनुसार नयाँ मोडेलले मुख्य तर्कशक्तिमा महत्वपूर्ण सुधार गर्दै जटिल चुनौतीहरू सामना गर्न अझ सक्षम आधार तयार गरेको छ।
गुगलले दाबी गरेको छ कि जीमीनी ३.१ प्रोले विभिन्न एआई बेन्चमार्कहरूमा अघिल्लो संस्करण ‘जीमीनी ३ प्रो’ तथा अन्य कम्पनीका प्रतिस्पर्धी मोडेलहरूभन्दा उत्कृष्ट प्रदर्शन गरेको छ।
कम्पनीका अनुसार यो मोडेल साधारण उत्तर पर्याप्त नहुने अवस्थाका लागि तयार गरिएको हो। यसले बहु–स्तरीय कार्य तथा जटिल प्रश्नहरू समाधान गर्न उन्नत तर्क प्रविधि प्रयोग गर्छ। जीमीनी ३.१ प्रोले जटिल विषयहरूको स्पष्ट र दृश्यात्मक व्याख्या तयार गर्न, ठूलो परिमाणको तथ्यांकलाई एकीकृत रूपमा विश्लेषण गर्न तथा सिर्जनात्मक कार्यप्रवाहमा सहयोग पुर्याउन उपयोगी हुने दाबी गरिएको छ।
यो मोडेल जीमीनी एपमार्फत सबै प्रयोगकर्ताका लागि उपलब्ध गराइएको छ। तर गुगल एआई प्रो र गुगल एआई अल्ट्रा सदस्यहरूले उच्च प्रयोग सीमा पाउनेछन्। साथै, यो मोडेल नोटबुक एलएममा पनि उपलब्ध गराइएको भए पनि त्यहाँ पहुँच भने प्रो र अल्ट्रा सदस्यहरूमा मात्र सीमित गरिएको छ।
नयाँ संस्करण सार्वजनिक भएसँगै जेनरेटिभ एआई क्षेत्रमा तर्क क्षमता सुदृढ गर्ने प्रतिस्पर्धा थप तीव्र बनेको विश्लेषण गरिएको छ।
