विराटनगर । नेपाली कांग्रेसका युवा नेता अभिषेक गिरीले मोरङ जिल्लाको ग्रामथान गाउँपालिकाका सयभन्दा बढी युवालाई पार्टीमा समाहित गराएका छन् । कांग्रेस मोरङ निर्वाचन क्षेत्र नम्बर ४ चुनावी प्रचारप्रसारका युवा परिचालन संयोजक गिरीले बिहीबार अन्य पार्टी परित्याग गरेका युवाहरूलाई पार्टी प्रवेश गराएका हुन् ।
कार्यक्रममा बोल्दै गिरीले चुनावको मुखमा यसरी ठूलो संख्यामा युवा कांग्रेसमा प्रवेश गर्नुलाई पार्टीले सकारात्मक संकेतका रूपमा लिएको बताए । युवाहरूको कांग्रेस प्रवेशले पार्टीको जनाधार थप मजबुत भएको धारणा उनले राखे ।
उनले आगामी निर्वाचनमा युवाशक्तिलाई परिचालन गर्दै पार्टीलाई विजयी बनाउन आफू प्रतिबद्ध रहेको पनि बताए । यता, विभिन्न पार्टी परित्याग गरेका युवाहरूले कांग्रेसका माध्यमबाट आफ्नो राजनीतिक यात्रा अगाडि बढाउने प्रतिबद्धता व्यक्त गरे ।
