काभ्रे । अरनिको राजमार्ग अन्तर्गत बनेपास्थित चाँदनी चोकमा टिपरले स्कुटरलाई ठक्कर दिँदा एक जनाको मृत्यु भएपछि स्थिति तनावग्रस्त बनेको छ। घटनामा एक जना घाइते भएका छन्।
बागमती प्रदेश ०१–००४ क ३४२३ नम्बरको टिपरले बागमती प्रदेश ०२–०६३ प ९१८९ नम्बरको स्कुटरलाई आज बिहान ठक्कर दिएको हो। दुर्घटनामा धुलिखेल नगरपालिका–८ घर भई बनेपा बस्दै आएका ३१ वर्षीय ओभन प्रधानको मृत्यु भएको प्रहरीले जनाएको छ।
घटनापछि आक्रोशित सर्वसाधारणले टिपरमा आगजनी गरेका छन्। प्रहरीले स्कुटर चालकको शव अस्पताल पठाएको छ भने टिपर चालक फरार रहेको जनाएको छ।
दुर्घटनापछि बनेपा क्षेत्रको यातायात ठप्प भएको छ र अवस्था नियन्त्रणमा लिन प्रहरी परिचालन गरिएको छ।
