विराटनगर । विराटनगर महानगरपालिका-५ स्थित एभरेस्ट सेकेण्डरी स्कुलमा आजदेखि दुई दिने शैक्षिक प्रदर्शनी सुरु भएको छ ।
आज पहिलो दिन एल केजी देखि कक्षा ५ सम्मका विद्यार्थीहरुले आ–आफ्नो प्रदर्शनी गरेका छन् । वर्षभरि पाठ्यक्रममा पढेका विषयवस्तुहरूलाई व्यवहारिक रुपमा के सिकियो भन्ने कुरालाई विभिन्न प्रोजेक्ट मार्फत प्रस्तुत गरेका हुन् ।
विभिन्न विषयका परियोजनाहरु अभिभावकलाई देखाउँदै उनीहरुले गरेको ब्रिफिङ सुन्दा अभिभावकहरु दंग परे ।
क्रियाकलापमा आधारित सिकाई पद्धति अवलम्वन गर्दै आएको एभरेष्ट स्कुलले मन्टेश्वरी तहमा थिम बेसमा अध्यापन गराउँदै आएको छ भने कक्षा २ देखि माथि पाठ्यक्रममा आधारित शिक्षा प्रदान गर्दै आएको छ ।
सोही अनुसारका कृयाकलापहरूलाई विद्यार्थीहरुले अभिभावकलाई देखाएका हुन् । उनीहरुले विभिन्न खेल खेलाउँदै उपहार दिँदै अभिभावकहरुलाई मनोरञ्जनसमेत गराएका छन् ।
बालबालिकाको प्रदर्शनी अवलोकन गर्नुभएका अभिभावक डा. नन्दकिशोर चौधरीले बालबालिकाले बनाएका परियोजना र उनीहरुले गरेको ब्याख्या राम्रो लागेको बताए ।
उनले यसरी गरिने सिकाइले सर्वाङ्गीण विकासमा टेवा पुग्ने बताए ।
अर्की अभिभावक रूपा श्रेष्ठले विभिन्न खेल खेलाउँदै बालबालिकाले बुझाएको हेर्दा र खेल मार्फत पढेका कुरा जान्न पाउँदा रमाइलो लागेको बताए ।
विद्यालयका भाइस प्रिन्सिपल कुन्दन पुरीले बालबालिकाले कक्षा कोठामा सिकेका कुराहरुलाई क्रियाकलापमार्फत प्रस्तुत गर्ने प्ल्याटर्फको रूपमा यो प्रदर्शनी रहेको बताए ।
यसले बालबालिकामा आत्मविश्वास अभिवृद्धि गर्दै सृजनशील बनाउन सहयोग पुग्ने उनले बताए ।
मन्टेश्वरी इन्चार्ज आरती घिमिरेले बालबालिकाले गर्ने स–साना कामहरुलाई सिकाएको व्यवहारिक रुपमा प्रस्तुत गर्ने बताइन् ।
यस्तै प्रदर्शनीको अवसरले धेरै उत्साही बनाएका विद्यार्थीहरुको भनाई छ । एभरेष्टले हरेक वर्ष प्रदर्शनी गराउँदै आएको छ ।
कक्षा ६ देखि माथिको प्रदर्शनी भने बुधबार हुने विद्यालयले जनाएको छ ।
