दमक । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले जेनजीको नाममा अपराधी समूहहरूले देशमा अस्थिरता सिर्जना गर्न खोजेको आरोप लगाएका छन् ।
झापामा आइतबार आयोजित नेपाल राष्ट्रिय शिक्षक संगठन झापाले आयोजना गरेको छलफल कार्यक्रममा सम्बोधन गर्दै एमाले अध्यक्ष ओलीले यस्तो बताएका हुन् ।
विश्वव्यापी रूपमा उस्तै प्रकारले अस्थिरता फैलाउने प्रयास भइरहेको र त्यसको निशानामा नेपालसमेत परेको उनको भनाइ छ ।
जनअसन्तोषको नाममा गरिएका आपराधिक क्रियाकलापले देश अप्ठ्यारो परिस्थितिमा पुगेको उनले बताएका छन् ।
बंगलादेशपछि नेपालमा पनि उस्तै प्रकारले आन्दोलन गरिएको स्मरण उनले गराए ।
शिक्षक आन्दोलनमा समेत धुसपैठ हुने आशंका रहेको उल्लेख गर्दै समयमै सचेत भएर आन्दोलन स्थगन गरिएकाले सम्भावित अप्रिय घटना टरेको अध्यक्ष ओलीले दाबी गरे ।
‘आन्दोलन केही दिन लम्बिएको भए त्यहाँ पनि घुसपैठ हुन सक्थ्यो’, ओलीले भने ।
शिक्षकहरूको समस्या समाधानका लागि आफूले पटक–पटक शिक्षक संघ–संगठनका प्रतिनिधिहरूलाई संवादका लागि बोलाएको स्मरण गर्दै उनले वार्ता र समझदारीमार्फत समस्या समाधान गर्नुपर्ने धारणा राखे ।
