विराटनगर । मोरङ निर्वाचन क्षेत्र नम्बर ६ बाट नेकपा एमालेका प्रतिनिधिसभा सदस्य उम्मेदवार विनोद ढकालले पितृशोकमा रहँदारहँदै पनि आफ्नो घोषणापत्र सार्वजनिक गरेका छन् ।
नेकपा एमालेका नेता एवम् मोरङ-६ का प्रतिनिधिसभा सदस्य उम्मेदवार ढकालले विराटनगर-५ सम्झना चोकस्थित निज निवासमा आइतबार पत्रकार सम्मेलन गर्दै ३० बुँदे प्रतिबद्धतापत्र सार्वजनिक गरेका हुन् ।
ढकालको घोषणापत्रमा विराटनगरको दीर्घकालीन समस्या बनिरहेको ढल निकास र डुबान समस्या समाधानका लागि गुरुयोजना बनाई लागू गर्ने, चक्रपथसहितको प्रमुख सडक कालोपत्रे गर्ने र गछिया, बुढीखोला, केशलिया तथा सिंगिया नदी नियन्त्रणका लागि विशेष योजना ल्याउने प्रतिबद्धता व्यक्त गरिएको छ ।
बन्द तथा रुग्ण उद्योग पुनः सञ्चालनमा ल्याउने, मजदुर हितमा विशेष कार्यक्रम ल्याउने र साना तथा घरेलु उद्योगको प्रवर्द्धन गर्ने प्रतिबद्धता पनि घोषणापत्रमा समावेश छ ।
शिक्षा क्षेत्रमा स्मार्ट क्लासरुम नीति लागू गर्ने, जेनजीहरूका लागि आधुनिक प्रविधिमार्फत नवप्रवर्तनमूलक सिकाइ र उच्च शिक्षाका विद्यार्थीका लागि ‘पढ्दै, कमाउँदै’ कार्यक्रम सञ्चालन गर्ने प्रतिबद्धता पनि घोषणापत्रमा उल्लेख छ ।
यसका अतिरिक्त, सुन्दरहरैंचाको छ पोखरी, बुढीगंगाको सिंगिया खोला र बौराहाको मधुपार्कसहितका पार्कहरूको स्थापना तथा हसिना सिमसारलाई पर्यटकीय क्षेत्र बनाउने, निर्वाचन क्षेत्रस्तरीय रंगशाला निर्माण, युवा उद्यमीलाई बिना धितो ऋणको व्यवस्था, ज्येष्ठ नागरिक, अपांग, दलित र एकल महिलाको सामाजिक सुरक्षा भत्ता वृद्धि लगायत विषय पनि घोषणापत्रमा समेटिएका छन् ।
ढकालले पूर्व सांसद कमरेड लालबाबु पण्डितको कार्यकालमा ५ अर्बभन्दा बढीको विकास निर्माण भएकोमा त्यसपछि क्षेत्रको विकास ठप्प भएको उल्लेख गर्दै पण्डितले सुरु गरेका अधुरा परियोजनाहरू प्राथमिकतासाथ पूरा गर्ने प्रतिबद्धता जनाएका छन् ।
भ्रष्टाचार नगर्ने र जनताको शिर कहिल्यै नझुकाउने प्रतिज्ञा गर्दै ढकालले सूर्य चिन्हमा मतदान गरी सेवा गर्ने अवसर दिन मतदातासँग अनुरोध गरेका छन् ।
नेकपा एमालेभित्र आफ्ना आवाजहरुलाई बुलन्द पार्ने नेताको रुपमा चिनिएका ढकाल स्थानीय कार्यकर्ता र जनताबीच लोकप्रिय नेताका रूपमा परिचित छन् ।
ढकालका बुबा विष्णुप्रसाद ढकालको १०१ वर्षको उमेरमा माघ २९ गते बिहान निधन भएको थियो ।
मोरङ क्षेत्र नम्बर ६ मा नेपाली कांग्रेसका नेता शेखर कोइराला, नेपाली कम्युनिष्ट पार्टीबाट ओपेन्द्र राय, राष्ट्रिय स्वतन्त्र पार्टीबाट रुविना आचार्यलगायत उम्मेदवार छन् । मोरङ–६ मा कुल १ लाख ३७ हजार ८ सय ३२ मतदाता छन् ।
