सुनसरी । जिल्ला सुनसरीको कोशी गाउँपालिका-८ अन्तर्गत पूर्व-पश्चिम राजमार्गमा आज एक अज्ञात पैदल यात्रीको सडक दुर्घटनामा परी घटनास्थलमै मृत्यु भएको छ।
इलाका प्रहरी कार्यालय भन्टाबारीले दिएको जानकारीअनुसार ट्राफिक प्रहरी पोस्ट भन्टाबारीबाट करिब २ किलोमिटर पश्चिममा रहेको उक्त स्थानमा अज्ञात सवारी साधनले ठक्कर दिँदा अनुमानित ३५ देखि ४० वर्ष उमेरका एक पुरुषको घटनास्थलमै मृत्यु भएको हो। मृतकको नाम, थर र वतन हालसम्म खुल्न सकेको छैन ।
घटनाको जानकारी प्राप्त हुनासाथ इलाका प्रहरी कार्यालय भन्टाबारीका प्रवर बनानि पुण्यप्रसाद अधिकारीको कमाण्डमा ४ जनाको प्रहरी टोली घटनास्थलमा खटिई गई लाश सुरक्षित राखिएको छ ।
लाशको मुचुल्का लगायत थप कानुनी प्रक्रिया पूरा गर्न जिल्ला प्रहरी कार्यालय सुनसरीबाट प्रहरी टोली घटनास्थलतर्फ प्रस्थान गर्ने तयारीमा रहेको जनाइएको छ ।
ठक्कर दिने सवारी साधन पहिचान नभई फरार रहेकोले हाल खोजतलास कार्य भइरहेको प्रहरीले जनाएको छ ।
प्रारम्भिक अनुसन्धानका क्रममा मदिराजन्य पदार्थको सेवन गरे नगरेको विषय खुल्न सकेको छैन भने तीव्र गतिमा सवारी चलाएको कारण दुर्घटना भएको अनुमान गरिएको छ ।
थप विवरण अनुसन्धानपश्चात् सार्वजनिक गरिने प्रहरीले जनाएको छ ।
