काठमाडौं — क्यानडाको ब्रिटिस कोलम्बिया प्रान्तस्थित टम्बलर रिजको एक माध्यमिक विद्यालयमा भएको सामूहिक गोलीकाण्डमा आरोपित आक्रमणकारीसहित कम्तीमा १० जनाको मृत्यु भएको छ।
रोयल क्यानेडियन माउन्टेड प्रहरी (आरसीएमपी)का अनुसार गोली चलाउने व्यक्ति महिला हुन् र उनले घटनापछि आफैँलाई पनि गोली हानी आत्महत्या गरेकी छिन्। मृतकहरूमध्ये नाबालक पनि हुन सक्ने प्रहरीको अनुमान छ।
घटनामा दुई जना गम्भीर घाइते भएका छन्। उनीहरूलाई हेलिकप्टरमार्फत अस्पताल लगिएको छ। अन्य २५ जनाको स्थानीय मेडिकल सेन्टरमा सामान्य चोटपटकको उपचार तथा स्वास्थ्य परीक्षण भइरहेको प्रहरीले जनाएको छ।
विद्यालयका बाँकी विद्यार्थी र कर्मचारीलाई सुरक्षित रूपमा बाहिर निकालिएको छ। प्रहरीले पीडितहरूको उमेर तथा आक्रमणमा प्रयोग भएको हतियारबारे गोपनीयताका कारण विस्तृत विवरण सार्वजनिक गरेको छैन।
टम्बलर रिज क्षेत्र भ्यानकुभरबाट करिब १ हजार १ सय किलोमिटर उत्तरमा पर्छ।
