काठमाडौं— सस्तो दरमा सुन उपलब्ध गराइदिने बहानामा ६० लाख रुपैयाँ लुटपाट गरेको आरोपमा एक जना प्रहरी हवल्दारसहित चार जनालाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालयले विशेष अपरेसनमार्फत चारै जनालाई नियन्त्रणमा लिई अनुसन्धान अघि बढाएको हो। पक्राउ पर्नेमा त्रिभुवन अन्तर्राष्ट्रिय विमानस्थलमा कार्यरत प्रहरी हवल्दार कर्णबहादुर सुनार समेत रहेका छन्।
अपराध अनुसन्धान कार्यालयका एसएसपी सन्तोष खड्काका अनुसार आरोपीहरूले सुन खरिद गर्न आएका व्यक्तिलाई आफूहरू सीआईबीका प्रहरी भएको भन्दै डर देखाई रकम लुटपाट गरेका थिए।
एसएसपी खड्काले भने, “प्रहरी हवल्दारसहित चार जनालाई पक्राउ गरी घटनाबारे गहिरो अनुसन्धान भइरहेको छ।”
प्रारम्भिक अनुसन्धानमा आरोपीहरूले सस्तो मूल्यमा सुन उपलब्ध गराउने आश्वासन दिएर पीडितलाई रकमसहित बोलाएको र त्यसपछि प्रहरी हुँ भन्ने परिचय दिएर रकम कब्जा गरेको खुलेको छ।
घटनाले सुरक्षाकर्मीको संलग्नतामा हुने आपराधिक गतिविधिप्रति गम्भीर प्रश्न उठाएको छ। प्रहरीले यस घटनामा अन्य व्यक्ति संलग्न छन् वा छैनन् भन्ने विषयमा पनि अनुसन्धान जारी राखेको जनाएको छ।
