काठमाडौं । रामेछापमा भएको बस दुर्घटनामा ६ जनाको मृत्यु भएको छ। मन्थली नगरपालिका–५ मसानटारमा आज बिहान भएको दुर्घटनामा दुई पुरुष र चार महिलाको ज्यान गएको प्रहरीले जनाएको छ।
रामेछापका सहायक जिल्ला अधिकारी रामबहादुर केसीका अनुसार ६ जनाको घटनास्थलमै मृत्यु भएको हो। दुर्घटनामा घाइते भएका ६ जनालाई उपचारका लागि अस्पताल पठाइएको छ।
बस नदीमा खसेका कारण हताहतको संख्या यकिन हुन नसकेको केसीले बताए। उनका अनुसार बसमा कति यात्रु सवार थिए भन्ने विवरण हालसम्म खुल्न सकेको छैन। दुर्घटनापछि डुंगामार्फत उद्धारकार्य जारी रहेको छ।
०३०१–०००५ ख–९९७५ नम्बरको बस काठमाडौंबाट ओखलढुंगातर्फ जाँदै गरेको अवस्थामा दुर्घटनामा परेको हो। घटनास्थलमा नेपाली सेना, नेपाल प्रहरी र सशस्त्र प्रहरी बल गरी तीनवटै सुरक्षा निकाय उद्धारमा जुटिरहेका छन्।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार घाइते तथा सम्भावित यात्रुको खोजीका लागि १० जनाको गोताखोर टोली परिचालन गरिएको छ।
