काठमाडौं । विदेश पठाउने प्रलोभन देखाएर ६८ लाख रुपैयाँ ठगी गरेको आरोपमा एक कन्सल्टेन्सी सञ्चालक पक्राउ परेका छन्।
पक्राउ पर्नेमा काठमाडौं महानगरपालिका–१० स्थित ह्याप्पी एजुकेशन कन्सल्टेन्सी का सञ्चालक, चितवनको राप्ती नगरपालिका–२ घर भएका ३२ वर्षीय बद्री सिलवाल छन्।
अध्ययन भिसामा दुई विद्यार्थीलाई पोर्चुगल पठाउने भन्दै २१ लाख ७० हजार रुपैयाँ असुल गरी फरार भएका उनलाई प्रहरी वृत्त लैनचौरले पक्राउ गरेको हो।
अनुसन्धानका क्रममा सिलवालले आफ्नो परिचय परिवर्तन गरी केदार प्रसाद सिलवाल का नाममा समेत ठगी गरेको खुलेको छ। उनले स्पेनमा विद्यार्थी भिसामा पठाउने भन्दै एक व्यक्तिबाट १२ लाख ४० हजार रुपैयाँ ठगी गरेको आरोप छ।
त्यसैगरी चार जनालाई सर्बिया पठाउने भन्दै २१ लाख ९० हजार ५ सय रुपैयाँ तथा स्पेन पठाउने नाममा थप तीन जनाबाट १२ लाख रुपैयाँ असुलेर ठगी गरेको जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईले जानकारी दिए।
