कञ्चनपुर । कञ्चनपुरमा जंगली हात्तीको आक्रमणमा परेर एक बालिकाको मृत्यु भएको छ भने एक जना घाइते भएका छन्।
जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक हेमबहादुर शाहीका अनुसार लालझाँडी गाउँपालिका–६ स्थित चानदेवमा जंगली हात्तीले आक्रमण गर्दा स्थानीय किसनसिंह साउदकी छ वर्षीया छोरी रोजिना साउदको मृत्यु भएको हो।
गए राति जंगली हात्तीले साउदको घरमा आक्रमण गरेको थियो। घरमा हात्ती पसेपछि भाग्ने क्रममा साउदकी ५५ वर्षीया आमा पार्वती साउद घाइते भएकी छन्। घाइते पार्वतीको थप उपचारका लागि धनगढी रेफर गरिएको प्रहरीले जनाएको छ।
प्रवक्ता शाहीका अनुसार गम्भीर घाइते भएकी रोजिनाको उपचारका क्रममा धनगढीस्थित नवजीवन अस्पतालमा मृत्यु भएको हो।
