काठमाडौं । मुग्लिङ–काठमाडौं सडकखण्डअन्तर्गत धादिङको थाक्रे गाउँपालिका–६ स्थित दसकिलोमा दुई वटा बस ठोक्किँदा एक जनाको मृत्यु भएको छ।
दाङबाट काठमाडौं आइरहेको प्रदेश नम्बर ३–०१–००६ ख १५५२ नम्बरको बस र काठमाडौंबाट रसुवातर्फ जाँदै गरेको बा.प्र.०१–००६ ख ५२०६ नम्बरको रिजर्भ बस आज बिहान करिब साढे ७ बजे आपसमा ठोक्किएका हुन्।
दुर्घटनापछि एउटा बस सडक किनारमा रहेको टिनले छाएको कच्ची पसलमा समेत ठोक्किँदा पसलमा क्षति पुगेको छ। सोही पसलमा चिया पिउन लागेका धादिङको धुनिवेशी नगरपालिका–९ स्याउले निवासी ३५ वर्षीय सुजन तामाङको मृत्यु भएको प्रहरीले जनाएको छ।
पसल नजिकै टिपर रोकेर चिया पिउन बसेका तामाङ गम्भीर घाइते भएका थिए। उनलाई उपचारका लागि ट्रमा सेन्टर लगिएकोमा उपचारकै क्रममा मृत्यु भएको जिल्ला प्रहरी कार्यालय धादिङले जानकारी दिएको छ।
दुर्घटनामा पसलका सञ्चालक बाँकेको वैजनाथ गाउँपालिका–१ निवासी ५४ वर्षीय खगेश्वर शर्मा र रसुवातर्फ जाँदै गरेको बसमा सवार ८ वर्षीया सफलता पुलामी मगर घाइते भएका छन्।
दुर्घटनामा संलग्न बसका चालकहरूलाई प्रहरीले नियन्त्रणमा लिएर घटनाबारे अनुसन्धान गरिरहेको जनाएको छ।
