विराटनगर । मोरङ बुढीगंगा गाउँपालिका-२ स्थित जेभियर्स इङ्लिस स्कुलले आफ्नो ११औं वार्षिकोत्सव तथा अभिभावक दिवस मनाएको छ ।
स्कुलले शनिबार वार्षिकोत्सव तथा अभिभावक दिवसको अवसर पारेर स्कुलले बुढीगंगा गाउँपालिकास्तरीय परीक्षा, एसइई र हिसानको वार्षिक परीक्षामा पालिकाभित्रमा उत्कृष्ट नतिजा दिन सफल विद्यार्थीलाई सम्मानित गरेको थियो ।
कक्षा ८ को पालिका स्तरिय परीक्षामा छात्रतर्फ अंकित कार्की क्षेत्री, छात्रातर्फ रितु मगर, एसइईमा छात्रतर्फ विजय पौडेल र छात्रातर्फ अञ्जली दास, हिसान परीक्षामा छात्रातर्फ ललिता राजवंशी र छात्रतर्फ रोहन दाहाल उत्कृष्ट भएका थिए ।
उत्कृष्ट विद्यार्थीहरूलाई बुढीगंगा गाउँपालिकाका अध्यक्ष जीतनारायण थापामगर, विद्यालयका प्रिन्सिपल परेश पोखरेल, प्याब्सन मोरङका अध्यक्ष जगत बस्नेतलगायतले सम्मान गरे ।
सोही अवसरमा दोस्रो सुटिङ बल विश्वकप प्रतियोगितामा नेपाललाई रजत पदक दिलाउने कक्षा १२ की प्रमिशा श्रेष्ठ र राष्ट्रपति खेलकुद प्रतियोगिता २०८१ म कराँते खेलमा उत्कृष्ट प्रदर्शन गर्ने पुष्पराज योक्पांगदेनलाई पनि सम्मान गरिएको थियो ।
कार्यक्रममा बूढीगंगा गाउँपालिका अध्यक्ष जीतनारायण थापामगरले गाउँपालिका भित्रको शिक्षामा सुधार भएको बताए ।
उनले शिक्षामा स्वस्थ प्रतिष्पर्धा आवश्यक रहेको बताए । विद्यालय र अभिभावकवीच राम्रो समन्वय हुन सके शिक्षामा धेरै सुधार हुने उनको भनाइ छ ।
प्याब्सन मोरङका अध्यक्ष जगत बस्नेतले जेभियर्स स्कुलले सीपयुक्त शिक्षा दिएको बताए । अध्ययनसँगै विद्यार्थीमा सीप पनि आवश्यक रहेको उनले बताए । विद्यालय प्रगतिपथमा रहेको उनले बताए ।
स्कुलका प्रिन्सिपल परेश पोखरेलले कक्षा नर्सरीदेखि १२ सम्म अध्ययनका लागि बुढीगंगा छाडेर अन्यत्र जानु नपर्ने बताए ।
उनले बुढीगंगाभित्र जेभियर्सले उत्कृष्ट शिक्षा दिइरहेको दाबी गरे । स्कुलका हरेक विद्यार्थी हरेक विधामा उत्कृष्ट रहेको बताए । शिक्षासँगै सीप पनि विद्यालयले दिइरहेको उनले बताए।
स्कुलकी अध्यक्ष सरिताकुमारी राना मगरले गुणस्तरीय शिक्षाका लागि स्कुलले अहोरात्र काम गरिरहेको बताइन् ।
शिक्षक, अभिभावक, विद्यार्थी सबैको सहयोगका कारण विद्यालयले शैक्षिक उपलब्धी हाँसिल गर्न सफल भइरहेको उनले बताइन् ।
कार्यक्रममा विद्यार्थीहरूले नृत्य, गायनलगायतका विभिन्न विधामा प्रस्तुती दिँदै उपस्थित अतिथि, शिक्षक-शिक्षिका र अभिभावकलाई मनोरञ्जन दिलाएका थिए ।
जेभियर्स स्कुलमा नर्सरीदेखि कक्षा १२ सम्म ९५० विद्यार्थी अध्ययनरत छन् ।
