विराटनगर — सुनसरीको देवानगञ्ज गाउँपालिका–२ मा बिहीबार मध्यराति विद्युत् सर्ट सर्किटका कारण भीषण आगलागी हुँदा दुई वटा घर पूर्ण रूपमा जलेर नष्ट भएका छन्। आगलागीबाट लाखौँ रुपैयाँ बराबरको धनसम्पत्तिमा क्षति पुगेको छ।
स्थानीय रहमान अन्सारीको घरमा विद्युत् सर्ट भई आगो सुरु भएको र केही समयमै आगो फैलिँदै छिमेकी इस्राफिल अन्सारीको घरसमेत खरानी भएको प्रहरीले जनाएको छ। काठ र टिनले बनेका घरहरू भएकाले आगो छिट्टै फैलिएको स्थानीयको भनाइ छ।
आगलागीमा परेर रहमान अन्सारीकी सासूआमा जसिरा खातुन घाइते भएकी छन्। उनको स्थानीय स्वास्थ्य संस्थामा उपचार भइरहेको छ। साथै आगलागीका क्रममा एउटा गाई जलेर मृत्यु भएको छ।
प्रारम्भिक क्षतिको विवरणअनुसार रहमान अन्सारीको घरमा करिब ६ लाख रुपैयाँभन्दा बढी र इस्राफिल अन्सारीको घरमा ३ लाख रुपैयाँभन्दा बढीको क्षति भएको अनुमान गरिएको छ।
रातिको समय र बस्तीभित्र आगलागी भएकाले उद्धार तथा आगो नियन्त्रणमा स्थानीयवासीलाई निकै कठिनाइ भएको थियो। देवानगञ्ज र कोशी गाउँपालिकाका दमकलको सहयोगमा लामो प्रयासपछि आगो नियन्त्रणमा लिइएको हो।
घटनाको विस्तृत विवरण संकलन भइरहेको प्रहरीले जनाएको छ।
