बैतडीमा जन्ती बोकेको बस दुर्घटनामा परेको छ। जिल्लाको पुर्चौडी नगरपालिका–७ को भौनीबाट जन्ती लिएर फर्किने क्रममा सोही वडाको बढ्गाउँ मोडमा बस दुर्घटना भएको हो।
जिल्ला प्रहरी कार्यालय बैतडीका डीएसपी दिपक कुमार रायका अनुसार सुप प्र ०२–००१ ख १११९ नम्बरको बस सडकबाट करिब २ सय मिटर तल खसेको छ।
‘दुर्घटनाको जानकारी पाएलगत्तै पुर्चौडी र ढोल्यामोडबाट प्रहरी टोली खटिएको छ। स्थानीयवासीहरूले पनि उद्धारमा सहयोग गरिरहेका छन्। हालसम्म १५ जनालाई नजिकैको स्वास्थ्य संस्थामा उपचारका लागि लगिएको छ,’ डीएसपी रायले बताए।
बेहुली लिएर बझाङको सुनकुडातर्फ फर्कने क्रममा बस दुर्घटनामा परेको हो। अहिले घटनास्थलमा उद्धार कार्य जारी रहेको र घाइतेहरूको अवस्था तथा क्षतिको पूर्ण विवरण आउन बाँकी रहेको प्रहरीले जनाएको छ।
