सर्लाही । सर्लाहीको लालबन्दीस्थित एक लघुवित्त वित्तीय संस्थामा दिनदहाडै लुटपाट भएको छ। बिहीबार दिउँसो अज्ञात समूहले वित्तीय संस्थाभित्र प्रवेश गरी लुटपाट गरेको हो।
इलाका प्रहरी कार्यालय लालबन्दीका इन्सपेक्टर वीरेन्द्र सिंह जोखारीका अनुसार ५–६ जनाको समूह कार्यालयभित्र प्रवेश गरी लुटपाटमा संलग्न भएको हो। लुटपाटका क्रममा समूहले संस्थाका कर्मचारीमाथि छुरा प्रहारसमेत गरेको उनले बताए।
छुरा प्रहारबाट केही कर्मचारी घाइते भएका छन्। उनीहरूको अवस्था सामान्य रहेको जनाइएको छ।
घटनाको जानकारी पाउनासाथ प्रहरी टोली घटनास्थलमा पुगेर थप अनुसन्धान सुरु गरेको छ। लुटपाट गर्ने समूहले कर्मचारीहरूलाई कोठाभित्र बन्द गरेर नगद तथा अन्य सामग्री लुटेको प्रहरीले जनाएको छ।
लुटेराहरूको खोजी कार्य तीव्र पारिएको प्रहरीले जनाएको छ।
