धनकुटाको साँगुरीगढी क्षेत्रमा प्रहरीले लागू औषध गाँजा सहित एक जनालाई पक्राउ गर्नुका साथै गाँजा बोकेको एक गाडी नियन्त्रणमा लिएको छ।
माघ २१ गते कोशी प्रदेश प्रहरी कार्यालयअन्तर्गत प्रादेशिक अनुसन्धान समूहबाट खटिएको प्रहरी टोलीले साँगुरीगढी गाउँपालिका–१ बाट ३३ किलो ५०० ग्राम लागू औषध गाँजा सहित सोही स्थानका ५४ वर्षीय ज्ञानबहादुर लिम्बुलाई पक्राउ गरेको हो।
यसैबीच, चेकजाँचका क्रममा प्रहरी चौकी मुलघाटबाट खटिएको प्रहरी टोलीले साँगुरीगढी गाउँपालिका–६ फेदीस्थित सडकछेउमा रहेको टाटा सफारी गाडी शंकास्पद देखी जाँच गर्दा गाडीभित्रबाट ९० किलो २३० ग्राम लागू औषध गाँजा बरामद गरेको छ।
प्रहरीका अनुसार उक्त गाडीमा बा.१० च ५६१५ नम्बरको नक्कली नम्बर प्लेट प्रयोग गरिएको पाइएको छ भने वास्तविक नम्बर BR 11 H 4874 रहेको खुलेको छ। गाँजाको ओसारपसारमा संलग्न अन्य व्यक्तिहरूको खोजतलास भइरहेको प्रहरीले जनाएको छ।
