विराटनगर । झापाको दमकमा टिपर र मोटरसाइकल ठोक्किँदा दुई जनाको मृत्यु भएको छ। दमक नगरपालिका–१ बरगाछीमा बुधबार दिउँसो भएको दुर्घटनामा मोटरसाइकलमा सवार दुई युवकको ज्यान गएको हो।
दमकबाट रामचोकतर्फ जाँदै गरेको मे १ ख २८८४ नम्बरको टिपरसँग दुर्गा मन्दिरबाट पेल्टीमारीतर्फ जाँदै गरेको प्र १–०१–०१८ प ८३०३ नम्बरको मोटरसाइकल ठोक्किँदा दुर्घटना भएको प्रहरीले जनाएको छ।
दुर्घटनामा मोटरसाइकल चालक इलामको चुलाचुली गाउँपालिका–४ का २२ वर्षीय प्रवेश राई र पछाडि सवार १९ वर्षीय जनम राई गम्भीर घाइते भएका थिए। उनीहरूलाई उद्धार गरी उपचारका लागि दमक अस्पताल लगिएको भए पनि अस्पताल पुर्याउनासाथ चिकित्सकले मृत घोषणा गरेको झापा प्रहरीका प्रवक्ता डीएसपी खगेन्द्रबहादुर खड्काले बताए।
दुर्घटनापछि प्रहरीले टिपर र चालक उदयपुरको त्रियुगा नगरपालिका–९ रातमाटेका ३२ वर्षीय हिवराज रायलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
