सिरहा– वैदेशिक रोजगारीका लागि आकर्षक तलबको प्रलोभन देखाएर एक युवकलाई भारत लगेर शरीर बन्धक बनाएको आरोपमा दुई जनालाई प्रहरीले पक्राउ गरेको छ ।
जिल्ला प्रहरी कार्यालय सिरहाका सूचना अधिकारी रमेशबहादुर पालका अनुसार कल्याणपुर नगरपालिका–७ का २६ वर्षीय सुरज मुखिया र लहान नगरपालिका–११ का २२ वर्षीय प्रशान्त चौधरी पक्राउ परेका हुन् ।
प्रहरीका अनुसार अभियुक्तद्वयले कल्याणपुर नगरपालिका–७ का रिशकेशकुमार मरिकलाई भारतको गया क्षेत्रमा आकर्षक रोजगारी लगाइदिने भन्दै प्रलोभनमा पारेका थिए । गत पुस २० गते भारत पुर्याएपछि उनीहरूको मोबाइल फोन र शैक्षिक प्रमाणपत्रसमेत खोसी एक होस्टलमा बन्धक बनाइएको पीडितले बताएका छन् ।
बन्धक बनाएर कुटपिट गर्ने तथा ज्यान मार्ने धम्की दिँदै अभियुक्तहरूले पीडितको परिवारबाट फिरौती रकम असुल गरेको प्रहरीले जनाएको छ ।
प्रहरीका अनुसार अभियुक्तहरूले पीडितको परिवारबाट दुई लाख १७ हजार २०० रुपैयाँ तथा मरिकको साथबाट ३० हजार भारतीय रुपैयाँ असुल गरेका थिए ।
घटनाबारे थप अनुसन्धान भइरहेको जिल्ला प्रहरी कार्यालय सिरहाले जनाएको छ ।
