सङ्खुवासभा — सङ्खुवासभाको चैनपुर नगरपालिका–१० इखुम्बुमा खुकुरी प्रहारबाट एक जनाको हत्या भएको छ। खुकुरी प्रहारबाट ४७ वर्षीय लिलाप्रसाद राईको मृत्यु भएको जिल्ला प्रहरी कार्यालय सङ्खुवासभाले जनाएको छ।
जिल्ला प्रहरी कार्यालयका प्रहरी निरीक्षक मेघराज अर्यालका अनुसार आज दिउँसो छिमेकी ५९ वर्षीय शिवकुमार राईले खुकुरी प्रहार गर्दा लिलाप्रसादको घटनास्थलमै मृत्यु भएको हो। गाईवस्तुले घाँस खाएको विषयलाई लिएर सुरु भएको विवाद उग्र बन्दै जाँदा शिवकुमारले लिलाप्रसादको छातीमा खुकुरी प्रहार गरेको प्रहरीको भनाइ छ।
घटनाको जानकारी पाएलगत्तै इलाका प्रहरी कार्यालय चैनपुरबाट प्रहरी निरीक्षक पर्शुराम राईको नेतृत्वमा टोली घटनास्थलमा पुगेको थियो। खुकुरी प्रहार गर्ने शिवकुमार राईलाई नियन्त्रणमा लिई थप अनुसन्धान थालिएको प्रहरीले जनाएको छ।
मृतकको शवपरीक्षणका लागि प्राथमिक स्वास्थ्य केन्द्र चैनपुरमा लगिएको छ भने घटनाका विषयमा विस्तृत अनुसन्धान भइरहेको जिल्ला प्रहरी कार्यालयले जानकारी दिएको छ।
