विराटनगर । विराटनगर महानगरपालिका–८ नम्बर वडा कार्यालयले ज्येष्ठ नागरिकको घरघर पुगेर स्वास्थ्य जाँच गर्दै कम्बल वितरणको कार्यक्रम प्रारम्भ गरेको छ ।
वडाध्यक्ष राम पोखरेलले मंगलबारदेखि स्वास्थ्यकर्मी साथमा लिएर वडाभित्र रहेका ८० वर्षमाथिका ज्येष्ठ नागरिकको स्वास्थ्य जाँच गर्ने कार्यको थालनी गरेका हुन् । वडा कार्यालयलले वडाबासी ज्येष्ठ नागरिकका लागि सराहनीय काम गरेको स्थानीय श्यामकुमार अधिकारीको प्रतिक्रिया छ ।
ज्येष्ठ नागरिकसँग वडा जनप्रतिनिधि कार्यक्रमअन्तर्गत रहेर वडाध्यक्ष पोखरेलले वडाबासी वृद्धवृद्धाको स्वास्थ्य परीक्षण गर्दै उनीहरूलाई न्यानो कपडा कम्बल वितरण गरेका हुन् । वडाध्यक्ष पोखरेलले आफू निर्वाचित भएयता नै ज्येष्ठ नागरिकको पक्षमा काम गरिरहेको बताउँदै त्यसैको निरन्तरता स्वरूप कम्बल वितरण गरिएको बताए ।
मंगलबार नगरप्रमुख शिल्पा निरला कार्कीको उपस्थितिमा वडा कार्यालयले स्वास्थ्य जाँचसहित कम्बल वितरण गरेको हो । ८ नम्बर वडाले मात्र नभएर महानगरपालिकाले पनि ज्येष्ठ नागरिकको हक हितका लागि काम गरिरहेको उपप्रमुख कार्कीको भनाइ छ ।
पछिल्लो तीन वर्षयता वडाले यो प्रकारको कार्यक्रम गर्दै आएको छ । पहिलो वर्ष वडाले ११७ जनालाई प्रेसर–सुगर जाँच गर्दै औषधि वितरण गरेको वडाले एउटा स्टिलको लठ्ठी, झुल, चार्जेबल लाइट, सुगरफ्री हर्लिक्स र फलफूल वितरण गरेको थियो ।
दोस्रो वर्ष १२३ जनाको स्वास्थ्य जाँच गरेर औषधि वितरण गरेको ब्रस, टेबल फ्यानसमेत दिएको थियो । यसपालि भने उमेरले आठ दशक पार गरेका १४० जना ज्येष्ठ नागरिकलाई वडाले स्वास्थ्य जाँचसहित कम्बल वितरण गरेको हो ।
